1 Peter 5
Ɓeda ga Abyeda
1Nsaiye ofye a eklisiya tukwoda, omi n mihin mi zhin tukwoda nu, n ma wyei mʼɓei ku gye Kristi woi fi tu n zundu, n mihin mʼɓei bwa wo mwa-mwa, n wo latu yi esa n wa jeze ɓe cei, Oma tukwodaje, emi wyegyi nfya ba ge: 2Fye ga Shekwoyi akni nyagyi, fyei shi ɓa bwa n bugbai gmanyi ntna wyice, to tu enya ɓo nfye ɓa bwa dna ko mim, ama ntuge awo fye pwa lo fya zhin Dagayi tnu-tnu. 3Fye toku ze abegyi yin, ama fye ku ze e-fye n nakni ɓa mi ɓa vi. 4Esa n Kniknayi tukwoda ɓei jeze ɓe fye ɓei gwo lowonyi nkwo bmiya-bmiya ta shando nyin.5Ofye aɓi kasa, fye vi aza ɓeda n ɓa gyilo nfya bye. Ofye vinya fye zhin aje bauta dna tukwo gba, ntuge Shekwoyi tu aza anabarka nɓa gba ɓahin tukwo, ama wo zhin gaba n nazai n ɓa mwa ɓahin tukwo. 6Nfya gba fyehin tukwo fi n Shekwoyi ikoda akun, wo ɓa ku fye wu n sayi nkwo wu dei-dei.
7Fye ku efya ɓesasa yakpe Wo vinya, ntuge wo pa fye ɓelo woi dna fye wye cici.
8Fye zhin peceiye fya ku zhigu, ntuge shetan, ofye nuwun-yi yakwo, wo zan laɓa ngye gaba mikunyi nu woi boh, woi ye oza n wo ɓa wan wa saya. 9Lami-gni esa n wo aɓeda ho, lakpe ma Dagayi, ha pa ge a Yesu viyi-aje n na nyiye vinya ce, sin wahala lo n ho sin nyi.
10Esa n fya ku wahala sin esa fyewyi, eyi Shekwoyi, n wo nu-nuyi n sun-sun gyei dna n Kristi nyi, wo ɓa ga fye mwa-mwa nyalo-nyalo nya. Owo n wohin tukwo wo ɓaɓe wo ku fye, wa mi fye zhi, wa ze fye akala-da ndu sapa. 11Iko zhin wonya nu har nyalo-nyalo. Amin.
12Mi ka fye wasikaye n Sivanus bmazhin yinu, n mi wyegye, wo zhin eyi zado gbenu-yi nu. Mi nna wyetu yi lo mi la bugba kala ga fye dna n wasikaye, ntuge mika seida gaiciya nya ga shi Shekwoyi tu anabarka wu. Nya ma gna fye dna ya nyi kwo kunce lo kwa bma fye zhin fya mi zhin dna wo ye-ye.
13Ikklisiya n kolo ya dna n Roma – kwo zhin fye mapuinu dna n Dagayi, - kwo tnu fye lo n kwo gnaɓiyi, n Markus yi ɓe emi nugun. 14Fye dna aje bwa-do n na a Yesu viyi ye-ye yi. Bugba fu kwo kun-sun nfyei n fye zhin Kristi nya nyi.
Copyright information for
GbrGAW